כו
וַיַּ֥עַן אִיּ֗וֹב וַיֹּאמַֽר׃
ב מֶה־עָזַ֥רְתָּ לְלֹא־כֹ֑חַ
ה֝וֹשַׁ֗עְתָּ זְר֣וֹעַ לֹא־עֹֽז׃
ג מַה־יָּ֭עַצְתָּ לְלֹ֣א חׇכְמָ֑ה
וְ֝תֻשִׁיָּ֗ה לָרֹ֥ב הוֹדָֽעְתָּ׃
ד אֶת־מִ֭י הִגַּ֣דְתָּ מִלִּ֑ין
וְנִשְׁמַת־מִ֝֗י יָצְאָ֥ה מִמֶּֽךָּ׃
ה הָרְפָאִ֥ים יְחוֹלָ֑לוּ
מִתַּ֥חַת מַ֝֗יִם וְשֹׁכְנֵיהֶֽם׃
ו עָר֣וֹם שְׁא֣וֹל נֶגְדּ֑וֹ
וְאֵ֥ין כְּ֝ס֗וּת לָאֲבַדּֽוֹן׃
ז נֹטֶ֣ה צָפ֣וֹן עַל־תֹּ֑הוּ
תֹּ֥לֶה אֶ֝֗רֶץ עַל־בְּלִי־מָֽה׃
ח צֹרֵֽר־מַ֥יִם בְּעָבָ֑יו
וְלֹֽא־נִבְקַ֖ע עָנָ֣ן תַּחְתָּֽם׃
ט מְאַחֵ֥ז פְּנֵֽי־כִסֵּ֑ה
פַּרְשֵׁ֖ז עָלָ֣יו עֲנָנֽוֹ׃
י חֹֽק־חָ֭ג עַל־פְּנֵי־מָ֑יִם
עַד־תַּכְלִ֖ית א֣וֹר עִם־חֹֽשֶׁךְ׃
יא עַמּוּדֵ֣י שָׁמַ֣יִם יְרוֹפָ֑פוּ
וְ֝יִתְמְה֗וּ מִגַּעֲרָתֽוֹ׃
יב בְּ֭כֹחוֹ רָגַ֣ע הַיָּ֑ם
ובתובנתו וּ֝בִתְבוּנָת֗וֹ מָ֣חַץ רָֽהַב׃
יג בְּ֭רוּחוֹ שָׁמַ֣יִם שִׁפְרָ֑ה
חֹלְﬞלָ֥ה יָ֝ד֗וֹ נָחָ֥שׁ בָּרִֽחַ׃
יד הֶן־אֵ֤לֶּה ׀ קְצ֬וֹת דְּרָכָ֗ו
וּמַה־שֵּׁ֣מֶץ דָּ֭בָר נִשְׁמַע־בּ֑וֹ
וְרַ֥עַם גְּ֝בוּרֹתָ֗ו מִ֣י יִתְבּוֹנָֽן׃