קכג
א שִׁ֗יר הַֽמַּ֫עֲל֥וֹת
אֵ֭לֶיךָ נָשָׂ֣אתִי אֶת־עֵינַ֑י
הַ֝יֹּשְׁבִ֗י בַּשָּׁמָֽיִם׃
ב הִנֵּ֨ה כְעֵינֵ֪י עֲבָדִ֡ים אֶל־יַ֤ד אֲֽדוֹנֵיהֶ֗ם
כְּעֵינֵ֣י שִׁפְחָה֮ אֶל־יַ֢ד גְּבִ֫רְתָּ֥הּ
כֵּ֣ן עֵ֭ינֵינוּ אֶל־יְהֹוָ֣ה אֱלֹהֵ֑ינוּ
עַ֝֗ד שֶׁיְּחׇנֵּֽנוּ׃
ג חׇנֵּ֣נוּ יְהֹוָ֣ה חׇנֵּ֑נוּ
כִּי־רַ֝֗ב שָׂבַ֥עְנוּ בֽוּז׃
ד רַבַּת֮ שָֽׂבְעָה־לָּ֢הּ נַ֫פְשֵׁ֥נוּ
הַלַּ֥עַג הַשַּֽׁאֲנַנִּ֑ים
הַ֝בּ֗וּז לגאיונים לִגְאֵ֥י יוֹנִֽים׃