תהלים קיח

קיח



א הוֹד֣וּ לַיהֹוָ֣ה כִּי־​ט֑וֹב
  כִּ֖י לְעוֹלָ֣ם חַסְדּֽוֹ׃
ב יֹאמַר־​נָ֥א יִשְׂרָאֵ֑ל
  כִּ֖י לְעוֹלָ֣ם חַסְדּֽוֹ׃
ג יֹאמְרוּ־​נָ֥א בֵֽית־​אַהֲרֹ֑ן
  כִּ֖י לְעוֹלָ֣ם חַסְדּֽוֹ׃
ד יֹאמְרוּ־​נָ֭א יִרְאֵ֣י יְהֹוָ֑ה
  כִּ֖י לְעוֹלָ֣ם חַסְדּֽוֹ׃
ה מִֽן־​הַ֭מֵּצַר קָרָ֣אתִי יָּ֑הּ
  עָנָ֖נִי בַמֶּרְחָ֣ב יָֽהּ׃
ו יְהֹוָ֣ה לִ֭י לֹ֣א אִירָ֑א
  מַה־​יַּעֲשֶׂ֖ה לִ֣י אָדָֽם׃
ז יְהֹוָ֣ה לִ֭י בְּעֹזְרָ֑י
  וַ֝אֲנִ֗י אֶרְאֶ֥ה בְשֹׂנְאָֽי׃
ח ט֗וֹב לַחֲס֥וֹת בַּיהֹוָ֑ה
  מִ֝בְּטֹ֗חַ בָּאָדָֽם׃
ט ט֗וֹב לַחֲס֥וֹת בַּיהֹוָ֑ה
  מִ֝בְּטֹ֗חַ בִּנְדִיבִֽים׃
י כׇּל־​גּוֹיִ֥ם סְבָב֑וּנִי
  בְּשֵׁ֥ם יְ֝הֹוָ֗ה כִּ֣י אֲמִילַֽם׃
יא סַבּ֥וּנִי גַם־​סְבָב֑וּנִי
  בְּשֵׁ֥ם יְ֝הֹוָ֗ה כִּ֣י אֲמִילַֽם׃
יב סַבּ֤וּנִי כִדְבוֹרִ֗ים
  דֹּ֭עֲכוּ כְּאֵ֣שׁ קוֹצִ֑ים
    בְּשֵׁ֥ם יְ֝הֹוָ֗ה כִּ֣י אֲמִילַֽם׃
יג דַּחֹ֣ה דְחִיתַ֣נִי לִנְפֹּ֑ל
  וַ֖יהֹוָ֣ה עֲזָרָֽנִי׃
יד עָזִּ֣י וְזִמְרָ֣ת יָ֑הּ
  וַֽיְהִי־​לִ֝֗י לִישׁוּעָֽה׃
טו ק֤וֹל ׀ רִנָּ֬ה וִישׁוּעָ֗ה בְּאׇהֳלֵ֥י צַדִּיקִ֑ים
  יְמִ֥ין יְ֝הֹוָ֗ה עֹ֣שָׂה חָֽיִל׃
טז יְמִ֣ין יְ֭הֹוָה רוֹמֵמָ֑ה
  יְמִ֥ין יְ֝הֹוָ֗ה עֹ֣שָׂה חָֽיִל׃
יז לֹא־​אָמ֥וּת כִּֽי־​אֶחְיֶ֑ה
  וַ֝אֲסַפֵּ֗ר מַעֲשֵׂ֥י יָֽהּ׃
יח יַסֹּ֣ר יִסְּרַ֣נִּי יָּ֑הּ
  וְ֝לַמָּ֗וֶת לֹ֣א נְתָנָֽנִי׃
יט פִּתְחוּ־​לִ֥י שַׁעֲרֵי־​צֶ֑דֶק
  אָבֹא־​בָ֝֗ם אוֹדֶ֥ה יָֽהּ׃
כ זֶה־​הַשַּׁ֥עַר לַיהֹוָ֑ה
  צַ֝דִּיקִ֗ים יָבֹ֥אוּ בֽוֹ׃
כא א֭וֹדְךָ כִּ֣י עֲנִיתָ֑נִי
  וַתְּהִי־​לִ֝֗י לִישׁוּעָֽה׃
כב אֶ֭בֶן מָאֲס֣וּ הַבּוֹנִ֑ים
  הָ֝יְתָ֗ה לְרֹ֣אשׁ פִּנָּֽה׃
כג מֵאֵ֣ת יְ֭הֹוָה הָ֣יְתָה זֹּ֑את
  הִ֖יא נִפְלָ֣את בְּעֵינֵֽינוּ׃
כד זֶה־​הַ֭יּוֹם עָשָׂ֣ה יְהֹוָ֑ה
  נָגִ֖ילָה וְנִשְׂמְחָ֣ה בֽוֹ׃
כה אָנָּ֣א יְ֭הֹוָה הוֹשִׁ֘יעָ֥ה נָּ֑א
  אָנָּ֥א יְ֝הֹוָ֗ה הַצְלִ֘יחָ֥ה נָּֽא׃
כו בָּר֣וּךְ הַ֭בָּא בְּשֵׁ֣ם יְהֹוָ֑ה
  בֵּ֝רַ֥כְנוּכֶ֗ם מִבֵּ֥ית יְהֹוָֽה׃
כז אֵ֤ל ׀ יְהֹוָה֮ וַיָּ֢אֶ֫ר לָ֥נוּ
  אִסְרוּ־​חַ֥ג בַּעֲבֹתִ֑ים
    עַד־​קַ֝רְנ֗וֹת הַמִּזְבֵּֽחַ׃
כח אֵלִ֣י אַתָּ֣ה וְאוֹדֶ֑ךָּ
  אֱ֝לֹהַ֗י אֲרוֹמְמֶֽךָּ׃
כט הוֹד֣וּ לַיהֹוָ֣ה כִּי־​ט֑וֹב
  כִּ֖י לְעוֹלָ֣ם חַסְדּֽוֹ׃