קא
א לְדָוִ֗ד מִ֫זְמ֥וֹר
חֶֽסֶד־וּמִשְׁפָּ֥ט אָשִׁ֑ירָה
לְךָ֖ יְהֹוָ֣ה אֲזַמֵּֽרָה׃
ב אַשְׂכִּ֤ילָה ׀ בְּדֶ֬רֶךְ תָּמִ֗ים
מָ֭תַי תָּב֣וֹא אֵלָ֑י
אֶתְהַלֵּ֥ךְ בְּתׇם־לְ֝בָבִ֗י בְּקֶ֣רֶב בֵּיתִֽי׃
ג לֹֽא־אָשִׁ֨ית ׀ לְנֶ֥גֶד עֵינַ֗י דְּֽבַר־בְּלִ֫יָּ֥עַל
עֲשֹֽׂה־סֵטִ֥ים שָׂנֵ֑אתִי
לֹ֖א יִדְבַּ֣ק בִּֽי׃
ד לֵבָ֣ב עִ֭קֵּשׁ יָס֣וּר מִמֶּ֑נִּי
רָ֝֗ע לֹ֣א אֵדָֽע׃
ה מלושני מְלׇשְׁנִ֬י בַסֵּ֨תֶר ׀ רֵעֵהוּ֮
אוֹת֢וֹ אַ֫צְמִ֥ית
גְּֽבַהּ־עֵ֭ינַיִם וּרְחַ֣ב לֵבָ֑ב
אֹ֝ת֗וֹ לֹ֣א אוּכָֽל׃
ו עֵינַ֤י ׀ בְּנֶֽאֶמְנֵי־אֶרֶץ֮ לָשֶׁ֢בֶת עִמָּ֫דִ֥י
הֹ֭לֵךְ בְּדֶ֣רֶךְ תָּמִ֑ים
ה֝֗וּא יְשָׁרְתֵֽנִי׃
ז לֹֽא־יֵשֵׁ֨ב ׀ בְּקֶ֥רֶב בֵּיתִי֮ עֹשֵׂ֢ה רְמִ֫יָּ֥ה
דֹּבֵ֥ר שְׁקָרִ֑ים
לֹֽא־יִ֝כּ֗וֹן לְנֶ֣גֶד עֵינָֽי׃
ח לַבְּקָרִ֗ים אַצְמִ֥ית כׇּל־רִשְׁעֵי־אָ֑רֶץ
לְהַכְרִ֥ית מֵעִיר־יְ֝הֹוָ֗ה כׇּל־פֹּ֥עֲלֵי אָֽוֶן׃