סד

לַמְנַצֵּ֗חַ מִזְמ֥וֹר לְדָוִֽד׃
ב שְׁמַע־​אֱלֹהִ֣ים קוֹלִ֣י בְשִׂיחִ֑י
  מִפַּ֥חַד א֝וֹיֵ֗ב תִּצֹּ֥ר חַיָּֽי׃
ג תַּ֭סְתִּירֵנִי מִסּ֣וֹד מְרֵעִ֑ים
  מֵ֝רִגְשַׁ֗ת פֹּ֣עֲלֵי אָֽוֶן׃
ד אֲשֶׁ֤ר שָׁנְנ֣וּ כַחֶ֣רֶב לְשׁוֹנָ֑ם
  דָּרְכ֥וּ חִ֝צָּ֗ם דָּבָ֥ר מָֽר׃
ה לִירֹ֣ת בַּמִּסְתָּרִ֣ים תָּ֑ם
  פִּתְאֹ֥ם יֹ֝רֻ֗הוּ וְלֹ֣א יִירָֽאוּ׃
ו יְחַזְּקוּ־​לָ֨מוֹ ׀ דָּ֘בָ֤ר רָ֗ע
  יְֽ֭סַפְּרוּ לִטְמ֣וֹן מוֹקְשִׁ֑ים
    אָ֝מְר֗וּ מִ֣י יִרְאֶה־​לָּֽמוֹ׃
ז יַ֥חְפְּֽשׂוּ עוֹלֹ֗ת
  תַּ֭מְנוּ חֵ֣פֶשׂ מְחֻפָּ֑שׂ
    וְקֶ֥רֶב אִ֝֗ישׁ וְלֵ֣ב עָמֹֽק׃
ח וַיֹּרֵ֗ם אֱלֹ֫הִ֥ים
  חֵ֥ץ פִּתְא֑וֹם
    הָ֝י֗וּ מַכּוֹתָֽם׃
ט וַיַּכְשִׁיל֣וּהוּ עָלֵ֣ימוֹ לְשׁוֹנָ֑ם
  יִ֝תְנֹדְﬞד֗וּ כׇּל־​רֹ֥אֵה בָֽם׃
י וַיִּֽירְא֗וּ כׇּל־​אָ֫דָ֥ם
  וַ֭יַּגִּידוּ פֹּ֥עַל אֱלֹהִ֗ים
    וּֽמַעֲשֵׂ֥הוּ הִשְׂכִּֽילוּ׃
יא יִשְׂמַ֬ח צַדִּ֣יק בַּ֭יהֹוָה וְחָ֣סָה ב֑וֹ
  וְ֝יִתְהַלְﬞל֗וּ כׇּל־​יִשְׁרֵי־​לֵֽב׃