קכט

שִׁ֗יר הַֽמַּ֫עֲל֥וֹת
רַ֭בַּת צְרָר֣וּנִי מִנְּעוּרַ֑י
  יֹאמַר־​נָ֝֗א יִשְׂרָאֵֽל׃
ב רַ֭בַּת צְרָר֣וּנִי מִנְּעוּרָ֑י
  גַּ֝֗ם לֹא־​יָ֥כְלוּ לִֽי׃
ג עַל־​גַּ֭בִּי חָרְשׁ֣וּ חֹרְשִׁ֑ים
  הֶ֝אֱרִ֗יכוּ למענותם לְמַעֲנִיתָֽם׃
ד יְהֹוָ֥ה צַדִּ֑יק
  קִ֝צֵּ֗ץ עֲב֣וֹת רְשָׁעִֽים׃
ה יֵ֭בֹשׁוּ וְיִסֹּ֣גוּ אָח֑וֹר
  כֹּ֝֗ל שֹׂנְאֵ֥י צִיּֽוֹן׃
ו יִ֭הְיוּ כַּחֲצִ֣יר גַּגּ֑וֹת
  שֶׁקַּדְמַ֖ת שָׁלַ֣ף יָבֵֽשׁ׃
ז שֶׁלֹּ֤א מִלֵּ֖א כַפּ֥וֹ קוֹצֵ֗ר
  וְחִצְנ֥וֹ מְעַמֵּֽר׃
ח וְלֹ֤א אָמְר֨וּ ׀ הָעֹבְרִ֗ים
  בִּרְכַּֽת־​יְהֹוָ֥ה אֲלֵיכֶ֑ם
    בֵּרַ֥כְנוּ אֶ֝תְכֶ֗ם בְּשֵׁ֣ם יְהֹוָֽה׃