תהלים קג

קג



א לְדָוִ֨ד ׀ בָּרְכִ֣י נַ֭פְשִׁי אֶת־​יְהֹוָ֑ה
  וְכׇל־​קְ֝רָבַ֗י אֶת־​שֵׁ֥ם קׇדְשֽׁוֹ׃
ב בָּרְכִ֣י נַ֭פְשִׁי אֶת־​יְהֹוָ֑ה
  וְאַל־​תִּ֝שְׁכְּחִ֗י כׇּל־​גְּמוּלָֽיו׃
ג הַסֹּלֵ֥חַ לְכׇל־​עֲוֺנֵ֑כִי
  הָ֝רֹפֵ֗א לְכׇל־​תַּחֲלוּאָֽיְכִי׃
ד הַגּוֹאֵ֣ל מִשַּׁ֣חַת חַיָּ֑יְכִי
  הַֽ֝מְעַטְּרֵ֗כִי חֶ֣סֶד וְרַחֲמִֽים׃
ה הַמַּשְׂבִּ֣יעַ בַּטּ֣וֹב עֶדְיֵ֑ךְ
  תִּתְחַדֵּ֖שׁ כַּנֶּ֣שֶׁר נְעוּרָֽיְכִי׃
ו עֹשֵׂ֣ה צְדָק֣וֹת יְהֹוָ֑ה
  וּ֝מִשְׁפָּטִ֗ים לְכׇל־​עֲשׁוּקִֽים׃
ז יוֹדִ֣יעַ דְּרָכָ֣יו לְמֹשֶׁ֑ה
  לִבְנֵ֥י יִ֝שְׂרָאֵ֗ל עֲלִילוֹתָֽיו׃
ח רַח֣וּם וְחַנּ֣וּן יְהֹוָ֑ה
  אֶ֖רֶךְ אַפַּ֣יִם וְרַב־​חָֽסֶד׃
ט לֹא־​לָנֶ֥צַח יָרִ֑יב
  וְלֹ֖א לְעוֹלָ֣ם יִטּֽוֹר׃
י לֹ֣א כַ֭חֲטָאֵינוּ עָ֣שָׂה לָ֑נוּ
  וְלֹ֥א כַ֝עֲוֺנֹתֵ֗ינוּ גָּמַ֥ל עָלֵֽינוּ׃
יא כִּ֤י כִגְבֹ֣הַּ שָׁ֭מַיִם עַל־​הָאָ֑רֶץ
  גָּבַ֥ר חַ֝סְדּ֗וֹ עַל־​יְרֵאָֽיו׃
יב כִּרְחֹ֣ק מִ֭זְרָח מִֽמַּעֲרָ֑ב
  הִֽרְחִ֥יק מִ֝מֶּ֗נּוּ אֶת־​פְּשָׁעֵֽינוּ׃
יג כְּרַחֵ֣ם אָ֭ב עַל־​בָּנִ֑ים
  רִחַ֥ם יְ֝הֹוָ֗ה עַל־​יְרֵאָֽיו׃
יד כִּי־​ה֭וּא יָדַ֣ע יִצְרֵ֑נוּ
  זָ֝כ֗וּר כִּי־​עָפָ֥ר אֲנָֽחְנוּ׃
טו אֱ֭נוֹשׁ כֶּחָצִ֣יר יָמָ֑יו
  כְּצִ֥יץ הַ֝שָּׂדֶ֗ה כֵּ֣ן יָצִֽיץ׃
טז כִּ֤י ר֣וּחַ עָֽבְרָה־​בּ֣וֹ וְאֵינֶ֑נּוּ
  וְלֹֽא־​יַכִּירֶ֖נּוּ ע֣וֹד מְקוֹמֽוֹ׃
יז וְחֶ֤סֶד יְהֹוָ֨ה ׀ מֵעוֹלָ֣ם וְעַד־​ע֭וֹלָם
  עַל־​יְרֵאָ֑יו
    וְ֝צִדְקָת֗וֹ לִבְנֵ֥י בָנִֽים׃
יח לְשֹׁמְרֵ֥י בְרִית֑וֹ
  וּלְזֹכְרֵ֥י פִ֝קֻּדָ֗יו לַעֲשׂוֹתָֽם׃
יט יְֽהֹוָ֗ה בַּ֭שָּׁמַיִם הֵכִ֣ין כִּסְא֑וֹ
  וּ֝מַלְכוּת֗וֹ בַּכֹּ֥ל מָשָֽׁלָה׃
כ בָּרְכ֥וּ יְהֹוָ֗ה מַלְאָ֫כָ֥יו
  גִּבֹּ֣רֵי כֹ֭חַ עֹשֵׂ֣י דְבָר֑וֹ
    לִ֝שְׁמֹ֗עַ בְּק֣וֹל דְּבָרֽוֹ׃
כא בָּרְכ֣וּ יְ֭הֹוָה כׇּל־​צְבָאָ֑יו
  מְ֝שָׁרְתָ֗יו עֹשֵׂ֥י רְצוֹנֽוֹ׃
כב בָּרְכ֤וּ יְהֹוָ֨ה ׀ כׇּֽל־​מַעֲשָׂ֗יו
  בְּכׇל־​מְקֹמ֥וֹת מֶמְשַׁלְתּ֑וֹ
    בָּרְכִ֥י נַ֝פְשִׁ֗י אֶת־​יְהֹוָֽה׃