לה
א וַיַּ֥עַן אֱלִיה֗וּ וַיֹּאמַֽר׃
ב הֲ֭זֹאת חָשַׁ֣בְתָּ לְמִשְׁפָּ֑ט
אָ֝מַ֗רְתָּ צִדְקִ֥י מֵאֵֽל׃
ג כִּֽי־תֹ֭אמַר מַה־יִּסְכׇּן־לָ֑ךְ
מָה־אֹ֝עִ֗יל מֵחַטָּאתִֽי׃
ד אֲ֭נִי אֲשִֽׁיבְךָ֣ מִלִּ֑ין
וְֽאֶת־רֵעֶ֥יךָ עִמָּֽךְ׃
ה הַבֵּ֣ט שָׁמַ֣יִם וּרְאֵ֑ה
וְשׁ֥וּר שְׁ֝חָקִ֗ים גָּבְה֥וּ מִמֶּֽךָּ׃
ו אִם־חָ֭טָאתָ מַה־תִּפְעׇל־בּ֑וֹ
וְרַבּ֥וּ פְ֝שָׁעֶ֗יךָ מַה־תַּֽעֲשֶׂה־לּֽוֹ׃
ז אִם־צָ֭דַקְתָּ מַה־תִּתֶּן־ל֑וֹ
א֥וֹ מַה־מִּיָּדְךָ֥ יִקָּֽח׃
ח לְאִישׁ־כָּמ֥וֹךָ רִשְׁעֶ֑ךָ
וּלְבֶן־אָ֝דָ֗ם צִדְקָתֶֽךָ׃
ט מֵ֭רֹב עֲשׁוּקִ֣ים יַזְעִ֑יקוּ
יְשַׁוְּע֖וּ מִזְּר֣וֹעַ רַבִּֽים׃
י וְֽלֹא־אָמַ֗ר אַ֭יֵּה אֱל֣וֹהַּ עֹשָׂ֑י
נֹתֵ֖ן זְמִר֣וֹת בַּלָּֽיְלָה׃
יא מַ֭לְּפֵנוּ מִבַּהֲמ֣וֹת אָ֑רֶץ
וּמֵע֖וֹף הַשָּׁמַ֣יִם יְחַכְּמֵֽנוּ׃
יב שָׁ֣ם יִ֭צְעֲקוּ וְלֹ֣א יַעֲנֶ֑ה
מִ֝פְּנֵ֗י גְּא֣וֹן רָעִֽים׃
יג אַךְ־שָׁ֭וְא לֹא־יִשְׁמַ֥ע ׀ אֵ֑ל
וְ֝שַׁדַּ֗י לֹ֣א יְשׁוּרֶֽנָּה׃
יד אַ֣ף כִּֽי־תֹ֭אמַר לֹ֣א תְשׁוּרֶ֑נּוּ
דִּ֥ין לְ֝פָנָ֗יו וּתְח֥וֹלֵֽל לֽוֹ׃
טו וְעַתָּ֗ה כִּי־אַ֭יִן פָּקַ֣ד אַפּ֑וֹ
וְלֹֽא־יָדַ֖ע בַּפַּ֣שׁ מְאֹֽד׃
טז וְ֭אִיּוֹב הֶ֣בֶל יִפְצֶה־פִּ֑יהוּ
בִּבְלִי־דַ֝֗עַת מִלִּ֥ין יַכְבִּֽר׃