יחזקאל לה

לה



א וַיְהִ֥י דְבַר־​יְהֹוָ֖ה אֵלַ֥י לֵאמֹֽר׃ ב בֶּן־​אָדָ֕ם שִׂ֥ים פָּנֶ֖יךָ עַל־​הַ֣ר שֵׂעִ֑יר וְהִנָּבֵ֖א עָלָֽיו׃ ג וְאָמַ֣רְתָּ לּ֗וֹ כֹּ֤ה אָמַר֙ אֲדֹנָ֣י יֱהֹוִ֔ה הִנְנִ֥י אֵלֶ֖יךָ הַר־​שֵׂעִ֑יר וְנָטִ֤יתִי יָדִי֙ עָלֶ֔יךָ וּנְתַתִּ֖יךָ שְׁמָמָ֥ה וּמְשַׁמָּֽה׃ ד עָרֶ֙יךָ֙ חׇרְבָּ֣ה אָשִׂ֔ים וְאַתָּ֖ה שְׁמָמָ֣ה תִֽהְיֶ֑ה וְיָדַעְתָּ֖ כִּֽי־​אֲנִ֥י יְהֹוָֽה׃ ה יַ֗עַן הֱי֤וֹת לְךָ֙ אֵיבַ֣ת עוֹלָ֔ם וַתַּגֵּ֥ר אֶת־​בְּנֵֽי־​יִשְׂרָאֵ֖ל עַל־​יְדֵי־​חָ֑רֶב בְּעֵ֣ת אֵידָ֔ם בְּעֵ֖ת עֲוֺ֥ן קֵֽץ׃ ו לָכֵ֣ן חַי־​אָ֗נִי נְאֻם֙ אֲדֹנָ֣י יֱהֹוִ֔ה כִּֽי־​לְדָ֥ם אֶעֶשְׂךָ֖ וְדָ֣ם יִרְדְּפֶ֑ךָ אִם־​לֹ֥א דָ֛ם שָׂנֵ֖אתָ וְדָ֥ם יִרְדְּפֶֽךָ׃ ז וְנָֽתַתִּי֙ אֶת־​הַ֣ר שֵׂעִ֔יר לְשִֽׁמְמָ֖ה וּשְׁמָמָ֑ה וְהִכְרַתִּ֥י מִמֶּ֖נּוּ עֹבֵ֥ר וָשָֽׁב׃ ח וּמִלֵּאתִ֥י אֶת־​הָרָ֖יו חֲלָלָ֑יו גִּבְעוֹתֶ֤יךָ וְגֵיאוֹתֶ֙יךָ֙ וְכׇל־​אֲפִיקֶ֔יךָ חַלְלֵי־​חֶ֖רֶב יִפְּל֥וּ בָהֶֽם׃ ט שִֽׁמְמ֤וֹת עוֹלָם֙ אֶתֶּנְךָ֔ וְעָרֶ֖יךָ לֹ֣א תישבנה תָשֹׁ֑בְנָה וִידַעְתֶּ֖ם כִּֽי־​אֲנִ֥י יְהֹוָֽה׃ י יַ֣עַן אֲ֠מׇרְךָ֠ אֶת־​שְׁנֵ֨י הַגּוֹיִ֜ם וְאֶת־​שְׁתֵּ֧י הָאֲרָצ֛וֹת לִ֥י תִהְיֶ֖ינָה וִֽירַשְׁנ֑וּהָ וַיהֹוָ֖ה שָׁ֥ם הָיָֽה׃
יא    לָכֵ֣ן חַי־​אָ֗נִי נְאֻם֮ אֲדֹנָ֣י יֱהֹוִה֒ וְעָשִׂ֗יתִי כְּאַפְּךָ֙ וּכְקִנְאָ֣תְךָ֔ אֲשֶׁ֣ר עָשִׂ֔יתָה מִשִּׂנְאָתֶ֖יךָ בָּ֑ם וְנוֹדַ֥עְתִּי בָ֖ם כַּאֲשֶׁ֥ר אֶשְׁפְּטֶֽךָ׃ יב וְֽיָדַעְתָּ֮ כִּ֣י אֲנִ֣י יְהֹוָה֒ שָׁמַ֣עְתִּי ׀ אֶת־​כׇּל־​נָאָֽצוֹתֶ֗יךָ אֲשֶׁ֥ר אָמַ֛רְתָּ עַל־​הָרֵ֥י יִשְׂרָאֵ֖ל לֵאמֹ֣ר ׀ שממה שָׁמֵ֑מוּ לָ֥נוּ נִתְּנ֖וּ לְאׇכְלָֽה׃ יג וַתַּגְדִּ֤ילוּ עָלַי֙ בְּפִיכֶ֔ם וְהַעְתַּרְתֶּ֥ם עָלַ֖י דִּבְרֵיכֶ֑ם אֲנִ֖י שָׁמָֽעְתִּי׃
יד    כֹּ֥ה אָמַ֖ר אֲדֹנָ֣י יֱהֹוִ֑ה כִּשְׂמֹ֙חַ֙ כׇּל־​הָאָ֔רֶץ שְׁמָמָ֖ה אֶעֱשֶׂה־​לָּֽךְ׃ טו כְּשִׂמְחָ֨תְךָ֜ לְנַחֲלַ֧ת בֵּֽית־​יִשְׂרָאֵ֛ל עַ֥ל אֲשֶׁר־​שָׁמֵ֖מָה כֵּ֣ן אֶעֱשֶׂה־​לָּ֑ךְ שְׁמָמָ֨ה תִֽהְיֶ֤ה הַר־​שֵׂעִיר֙ וְכׇל־​אֱד֣וֹם כֻּלָּ֔הּ וְיָדְע֖וּ כִּי־​אֲנִ֥י יְהֹוָֽה׃